Eit møte med trubaduren frå Engeset! Om Sigvard Engeset (1885-1974) er det sagt at han er å rekne mellom dei største songforfattarane i førre hundreåret. Han skreiv mellom 500 og 600(!) songar og salmar. Dei kom i all hovudsak til ved at han nynna ein melodi, gjerne medan han var ute og gjekk, og skreiv sidan vers etter vers rett ned på papiret. Sigvard Mathias Engeset vart fødd i Syvergarden på Engeset i Ørsta for 140 år sidan. I det høve vil Ørsta Frikyrkje markere jubileet søndag 16. November med ein songkveld. Vi har fått med oss tenoren Frode Ose, Kirsten Ragnhild Grimstad og Jon Ståle Lystad til å ta seg av det musikalske, medan Elin Krøvel-Velle og Elias Roger Moe vil lose oss gjennom kvelden med glimt frå Engeset sitt innhaldsrike liv. Mange i lokalmiljøa våre har framleis gode minne knytt til Sigvard Engeset og set stor pris på songane hans. Dei vil såleis ha stor glede av dette arrangementet. Vel møtt til ein søndagskveld der både allsong og solistinnslag vil stå i sentrum. Kollekt til song- og musikklivet på Frikyrkja.